Manyanya Awaasa Wanafunzi Wa Kike Kusoma Masomo Ya Sayansi Kwa Manufaa Ya Taifa

Wanafunzi wa kike nchini wametakiwa kuongeza bidii katika masomo ya sayansi, ili waweze kulisaidia taifa katika sekta mbalimbali muhimu ikiwemo sekta ya afya.

Kauli hiyo imetolewa na naibu waziri wa elimu, sayansi na teknolojia Mhandisi Stella Manyanya, wakati wa mahafali ya nne ya shule ya sekondari ya Wama Nakayama, iliyopo wilayani Rufiji mkoani Pwani.

Aidha Manyanya ameeleza kuwa wanafunzi wanatakiwa kuangalia upungufu uliopo kwenye sekta mbalimbali nchini huku akikazia sekta ya afya ambayo amesema bado ina changamoto ya uhaba wa wafanyakazi na kuwahimiza wanafunzi hao kutokata tamaa ya masomo hayo kwani ndio yenye uhakika wa ajira.

Manyanya amesema kuwa ili kuepusha hatari mbalimbali zinazotokea kwenye vituo vya afya ikiwemo vifo vya akina mama, inahitajika nguvu ya uwepo wa wataalamu wa kutosha wa afya kwenye sekta hiyo.

Kwa upande wake Mwenyekiti wa shule hiyo ambaye ni mke wa rais mstaafu wa Tanzania Dkt Jakaya Kikwete, Mama Salma Kikwete, amesema kuwa anajivunia maendeleo mazuri ya shule hiyo na kuwataka wanafunzi waendelee kujifunza zaidi yale wanayofundishwa shuleni hapo.

Kwa upande wa nidhamu, Mama Salma Kikwete amesema anawashukuru wanafunzi wa shule hiyo kwa kuwa na nidhamu nzuri huku akisisitiza kuzidi kujiepusha na vishawishi vinavyoweza kuwapotosha.

Wama Nakayama ni shule iliyoanzishwa mwaka 2010 na imetokana na majina mawili ya Wama na Nakayama ambapo Wama inasimama kama taasisi ya wanawake na maendeleo, Nakayama inasimama kama jina la mdau wa kwanza wa shule hiyo kuisaidia kimaendeleo, ambaye ni mfanyabiashara mkubwa kutoka nchini Japan.

About Unknown

This is a short description in the author block about the author. You edit it by entering text in the "Biographical Info" field in the user admin panel.